Thursday, January 15, 2009

Multi Post


بسم الله الرحمن الرحيم
أولا
بعتذر عن تأخيرى عن الكتابه الفترة دى كلها لظروف خارج ارادتى
ثانيا
فى تعليق اتكتب على اسم المدونه سيريالى
هوا ايه موضوع السيريالية اللي ماشية في البلد دي؟ كل ما اكلم حد يقوللي سيريالية كل ماحد بيحب يبان غامض يقول سيريالية كلكم ظالمين السيريالية ياسلام عليها.. مش ممكن بالذات لو كانت بالصلصة..
لذيذة مدونتك يا ابلة.. ورينا بقى البوستات الجامدة
احب اقول للاستاذ الى علق ان السيرياليه عمرها ماكانت غموض وانى مظلمتش السيرياليه لانى فاهمه معناها كويس .. واوعدك فى البوستات الجايه ان شاء الله هوضح معنى السيرياليه وليه اخترت الاسم ده
:s
يا صلصه
ثالثا
شكرا لكل الى جه المدونه وانا مش هنا وعلق او معلقش حتى
رابعا
كل سنة وانت طيبين عشان كل المناسبات الى عدت وانا معرفتش اهنيكم عليها
خامسا
انا اتخطبت وعقبال كل البنات يارب والولاد كمان عشان ميقلبوش عليا



Saturday, June 21, 2008

قافلين وهنفتح فى 1/8

البلوج العسل الى زى صاحبتها دى
مــغـــلــــقـــــــــــــة
لحد ما ارتاح شوية من دوشة الامتحانات
ولحين الإنتهاء من النيولوك الى بعملهولها

Sunday, April 6, 2008

in da hell

مصر
تشهد احداث اضراب عام
وأنا
فى بيتنا لوحدى مش بعمل حاجه معترضه انا كمان ومش خرجت من بيتنا
والناس
فى الشارع معترضين ومش بيطلبوا المستحيل بس عايزين المرتبات تكون مناسبة للاسعار والعكس
والامن
اعتقل مصريين كتير منهم صديقى الهوارى وانا زعلانه جدا عليه
والحكومة الحلوة
بتقول من حق الناس تطالب بحقها لكن الاضراب ممنوع وضد قانون الطوارئ
وقانون الطوارئ
بيمنع التجمهر بموجب القانون 10 لسنه 1914 والمعروف بقانون التجمهر وبيعاقب على التجمهر المكون من 5 اشخاص اقل حاجه حتى لو واقفين مش ارتكبوا اى جريمة بس هو كده وخلاص
وحقوق الانسان
بتشرع التجمهر وبتقول ان القانون اياه فيه مخالفة صريحة لنص المادة (54 ) من الدستور وده جزء من القانون الطبيعي للدولة و وطبعا كده واضحه اوى الفلسفه المعقده والمتخلفه لتعامل الدوله مع المواطنين
والاراء
فى تضارب بين مؤيد ومعارض ومحايد بس كله قرفان من الغلاء وارتفاع الاسعار وكله كفران من المرتبات الى مش بتكمل لاخر الشهر
وانا
وانت
ورقصنى يا جدع
لولولولولولولولولولللللى

Saturday, April 5, 2008

نــــــــــــــــــــدى

البقاء لله
عشان قلبها بئى كبير اوى
ماتت
ربنا يعوض شبابها خير فى الجنه

Friday, March 21, 2008

الدنيا دى 15 واحد


إن الواحد يقابل واحد صاحبه بالصدفة.. ممكن
إن الواحد يقابل وجوه مألوفه بالنسبه له بالصدفه .. ممكن
إن الواحد يقابل شخص عارفه على النت بترتيب ميعاد مش بالصدفه .. عادى
لكن ان الواحد يقابل مدون بس بيقراله وخلاص ومفيش بينهم كلام بالصدفه.. دة بأى الى غريب جدا
-----------
دة بالظبط الى حصل لما رحت مركز القاهرة لدراسات حقوق الانسان عشان اجيب داتا عن مشروع التخرج بتاعى
قابلت هناك المدون محمد عز صاحب مدونه بيت العز والمذيع بإذاعه حريتا
وعرفت انه هو الشخصيه دى بالصدفه برده انا كنت مفكرة فى الاول الموضوع تشابه اسماء لكن اتأكدت انه هو لما عرض عليا انه يدينى رقم احدى الشخصيات الى هتكون ضيفه معايا فى الفيلم وقالى انه كان عامل معاها لقاء فى حريتنا
وقتها لقيتنى بقوله بمنتهى التلقائية ومن غير ترتيب كلام : ايييييييييه ده انا عارفاااااااك
وقلتله انى معايا رقمها برده منك لانى خليت واحد صاحبنا احنا الاتنين يجيب منه الرقم
وهو كمان قالى انه متذكر اسمى لانى علقت عنده فى المدونه كذا مرة
الصراحه
الموقف بالنسبه لى كان لذيذ جدا وكنت مبسوطه جدا جدا ومستغربه جدا جدا جدا
محمد عز قال تعليق جميل جدا بجد ضحكنى
يااااااااااه يا جماعه دة الدنيا دى 15 واحد بيلفوا يلفوا ويرجعوا يتقابلوا تانى
الدنيا صغيره فعلا
----------
يااااااااااارب
يارب يارب يارب
كل الناس الى اتفرقت عن بعض بمزاجها او غصب عنها يرجعوا يتقابلو تانى بالصدفه او بترتيب ميعاد مش هتفرق
بس المهم يتقابلوا تانى
يارب تقرب البعيد ومش تفرق اى اتنين بيحبوا بعض بجد وتوفقهم للخير دايما
-------------
بالمناسبه دى عايزة اشكر محمد عز على المساعده الى قدمها لينا وبعتذرله عن اى قلق او تعب سببناه
وكمان كل سنه وحريتنا طيبه لانها يوم الخميس 20مارس كملت سنه
والى الأمام يا مسيو وربنا يوفقك :)

Tuesday, January 15, 2008

!ايه دة ؟؟




The Last SCREAM
---------
_1_



"انا عمرى ما شفت كدة قبل كدة .. غباء بالشكل دة !! الناس عادت مستهترة جدا بمصير اى حد بيقع تحت ادارتهم .. كفاية بأى عشان انا اتخنقت .. وتعبت "



هكذا حدثتنى نفسى بعد مرور خمس سنوات على هذا العبث







_______________







It Just MEMORIES
------------



_2_
كانت الايام شكل الأيام وقتها .. وكانت الظروف نفس الظروف ساعتها .. حتى الشخص كان .. كان هو هو .. طيب ايه اللى فرق امبارح عن النهاردة !؟


الإجابة مطلعتش "أنــــــا " طلعت " هــــــــو"
----------------------------







The WEAKNESS
-----

_3_
"الكلام معادش ليه لازمة .. بجد انا تعبت كلام ، وكل محاولاتى أصبحت فاشلة جداً جداً .. حاسة بالضعف ومعادش بإيدى شئ اعمله .. نفسى اعيط حتى دموعى مش قادرة عليها ومش عايزة تنزل وتريحنى "
ايه السبب ؟
محدش عاد بيريح !!




__________________






Being LONLEY
--------
_4_
مش عايزة أشوف حد ولا حد يشوفنى ..
مش عايزة اسمع حاجة
مش عايزة اتكلم ولا افكر
مش عايزة احس حاجة وحشة ولا حلوة
على الاقل مؤقتا !!



------------------


















امشى انا مش عايزة افتكرك
--------------------
_5_
IF i smile and don't believe
SOON i know i'll wake from this dream
Don't try to fix me i'm not broken
Hello i'm the lie living for you so you can hide
don't cry
Suddenly i know i'm not sleeping
Hello i'm still here
all that's left of yesterday
*
* Hello => EVANSCENCE..




Monday, December 31, 2007

تاج فى عز الامتحانات


رحيل او ساسو زى مابحب اقولها دايما مررتلى التاج دة بعد ما هى اتدبست فيه .. وقالت فى اخره انها شريرة ومش اللى مش هيرد هو عارف ايه الى هيحصله .. وبما اننا صحاب طبعا وبمووووت فيها قررت ارد حتى وانا عندى مذاكرة وامتحانات ...بما انى كدة كدة مش عارفة ابعد عن النت حتى اليومين دول
انا لاحظت معظم البلوجرز الى بيجيلهم تاج بيحطوا معاه صورة تاج ملكى
انا حطيت تاج زفاف عشان يبقى وشه حلو على كل البنات الى هتقرا البوست
وعليا انا وساسو طبعا
اهو تاج برده وشغال
بسم الله الرحمن الرحيم وهنبدأ الليلة
تيراراراراااا
**********
لو مكنتش مصرى بس عربى كانت هتبقى ايه نظرتك للمصرين واللى بيحصل فى مصر دلوقتى؟
كنت هشوف ان مصر بلد جميلة جدا وناس طيبة وشعب غلبان وادارة مفترية (بلاش اقول حكومة ظالمة ) خلينا فى السليم احسن
___________________________
لو كنت اوربى او غير مسلم هتبقى ايه نظرتك للعرب والمسلمين؟
انا بحب جدا انى اقرا عن الديانات التانية واقارن بينها وبين بعضها .. اعتقد انى لو كان عقلى وانا مش مسلمة زى دلوقتى كنت هغير ديانتى واتحول للاسلام .. بس متهيئلى كنت هواجه صعوبات شديدة وكنت هبقى لوحدى ومش حد هيساعدنى
نظرتى للعرب والمسلمين مش هكدب وهقول انها هتبقى كويسة .. لانى مش هكون عاشرتهم كفاية بشكل يخلينى اعارض الى بشوفه فى وسائل الاعلام واقول لا دول ناس زى الفل.. احنا متبهدلين فى الاعلام كله ، وبسبب دراستى ومعايشتى لواقع الاعلام فى بلدى بقولها بمنتهى الثقة .. ان اعلامنا مش يقدر يثبت عكس اللى بيتقال علينا
!!!انا قربت اصدق اننا ارهابيين
______________________________
لو قالوا لك انك بقيت رئيس جمهورية هتعمل ايه؟
مسئوليه صعبة اوى اكييييد ... اممم
هغير الدستور
وهحاول ان المستشارين بتوعى يكونوا عالم محترمة ونضيفة واذكياء ويحسوا بالناس
هحكم بمبدأ .. لا ضل من استخار ولا خاب من استشار
____________________________
لو سمح لك برؤية الرسول صلى وانك هتقول كلمه واحده؟
اشفع لنا
_________________________________
لو كنا فى عصر اذدهار الاندلس كنت تتخيل نفسك ازاى؟
حد ايجابى ومبتكر ومبدع بدرجة اكبر من دلوقتى كتير.. كنت هتمنى ابقى كدة لكن بصراحة مش عارفة اتخيل
____________________________________
لو خطبت واحده او اتخطبتى لواحد واثناء الخطبة اكتشفت او اكتشفتى ان الطرف الاخر غير قادر على الانجاب هيكون ايه تصرفك
لو اتخطبت لحد هيكون حالة من اتنين يااما بحبه اوى .. يااما هو مناسب اوى
فى الحالة الاولى مستحيلة اسيبه
فى الحالة التانية مش هقولك برده انا هسيبه فورا .. اساسا موضوع العيال دة مش فى دماغى اوى يعنى
بس الحاجة الى تخلينى مش طايقاه انه يكون غبى ومش فاهمنى .. او انه يكون مش فى بينا لغه حوار محترمة ومهذبه
عشان كدة كدة الحب والاعجاب وكل الحاجات الحلوة دى حتهدى فى يوم ومش هيفضل بينا غير الاحترام والتفاهم هو الى هيمشى حياتنا واحنا مرتاحين
_____________________________
لو طلعت على القمر هتكتب ايه؟
أشهد ان لا اله الا الله واشهد ان محمد عبد الله ورسوله
رضيت بالله ربا وبالاسلام دينا وبسيدنا محمد صلى الله عليه وسلم نبيا ورسولا
يارب ادخل الجنة انا وكل الناس الى بحبهم
يارب سامحنا كلنا
خلـــــــــــــــود صــــــــــلاح
وهكتب
بحبـــــــــــــــــــك
لو كان فى حد بحبه وقتها
I MISS U DADY
وحشتنى اوى بجد
اوى
_________________________
لو مررت التاج لحد وماجاوبش هتعمل ايه؟
ولا حاجة
________________________
تمرر التاج لمين؟
مش لحد معين
الى عايز يرد عليه حتى لو من القراء حتى لو هيرد عليه فى التعليقات
كل واحد براحته يعنى
:)
____________________
شكـــــــــــراً سارة
:)

Thursday, December 27, 2007

كنا وكان الزمان

شبابيك الدنيا كلها شبابيك
والسهر والحكاية والحواديت كلها دايرة عليك
والكلام كان كان عليك
والى كان خايف عليك انتهى من بين اديك
دى عنيك شبابيك
والدنيا كلها شبابيك سرقت عمرى من احزانى
سرقتة لكن ماجانى ولا حد شاف فين مكانى ورى الشبابيك
غيرت ياما كتير احوالى وانا كنت عاشق
وكان يحلالى احب بس يكون حلالى
ورى الشبابيك
انا بعت الدموع والعمر طرحت جناينى فى الربيع الصبر
وقولت انا عاشق سقونى كتير المر ورى الشبابيك
دى عنيك شبابيك
والدنيا كلها شبابيك
منيــــــــــــــــر

Saturday, December 22, 2007

التهييييييييسة الاخيرة

انــــا: انا هقوم اذاكر بأى يا كوكو
فاير: كوكو دة ايه ان شاء الله ؟؟ مين كوكو دة ؟؟
أنـــا : اى حاجة اللى جه على بالى .. ما علينا
فاير: انا رشا بتقولى يا كوكو ..والنهاردة سى مصطفى لقيته خدها منها وقال عاوز يقولى يا كوكو
أنـــا : ليه ان شاء الله .. هو اى حد يقولك يا كوكو ولا ايه ؟؟ اوعى تسيبه يقولك كدة أحسن ياخد عليك ( مواهاهاها)بسخنه
فاير :مين قالك انى سكتله .. انا محدش يقولى كوكو غير بوسى بس ( اخته رشا بيقولها بوسى ) تقليد بأى
أنــأ: ايوة شاطر .. مش كفاية هياخد رشا ..عايز ياخد الاسم الى بتقولهولك هو كمان .. مش كفاية هياخد بوسى يعنى .. ايه العبث دة ؟
فاير: خلاص يا سوسة كفاية تهوية ع الفحم انا مش ناقص
أنـــا: كمان ايه دة ؟؟ مش قادر يعنى يستنى لما تخلص امتحانات ..رايح ياخد اختك حبيبتك بوسى روح قلبك فى وقت منيل زى دة ؟؟دة انا محدش قدر يعمل فيا كدة وأجلت الدنيا كلها عند جهاد لحد ما خلصت امتحانات ... لالالا يا احمد معرفش عنك كدة
(خلاص هيعيط منى )
بص انا هعمل معاك حيوار وهنزله ع البلوج.. قشطة؟؟
فاير: حيوار ههههههههه
انــا : ايووون حيوار
فاير: من امام احدى بيوت ال .. كان معكم نادر سيف الدين ..لولولوللى
انــا : كل دة هيتنشر عشان تظهر على حقيقتك السوداء الغمقاء
قشطة يالا هنبدأ
فاير: طيب 1
2
3
1
اكشن
اعزائى المشاهدين فى كل مكان اهلا ومرحبا بكم فى حلقة جديدة من برنامج خلف الاسوار
انـــا : شششششش انا الى بقدم مش انت
فاير: طيب بجد والله يلا نبدأ ..اتفضلى ..احم احم احم ... ايوة معاكى
أنــا : (برزااااالة) قولى شعورك كدة وانت اخو العروسة ؟
فاير:انا عاوز اقولك انا لحد دلوقتى مش فاهم حاجة .. مش مستوعب .. بجد احساس غريب ، مش متخيل ازاى يعنى ، طب هو بجد ؟؟ ولا بيقولوا كدة بيضحكو عليا ؟؟ اصل احنا اخوات من 21 سنة هههههههههه
مش بحب اتأثر وازعل وكدة فعشان اضيع الفيلنج دة بقعد اغلس عليها واقولها يلا اريح .. احسن هنخلص منك وبقالنا حوالى شهر بنغلس على بعض بهزار كدة يمكن ننسى الفيلنج دة
البت اختى دى هتوحشنى المصيبة
عــــــــــــــــــــــارفة ؟؟
انــا : اممم
فاير: كنت عندها فى الشقة يوم الوقفة بظبطلها التفنيش النهائى ..كنت لوحدى ملقتش كهربائى قعدت عملتلها انا الحاجة. واشتغلتلها انا .. لقيت الشقة مفروشة.. من كتر ما العفش ذوقنا وكده حسيت ان انا فى اوضة من شقتنا.. انه ملحق مثلا ولا اكستنشن بس متخيلتش برضه انها هتبقى حياه مستقلة وبيت تانى
انــا : هى هتسافر مع مصطفى ولا فى كايرو معاك ؟
فاير:هى ليها شقتها فى كايرو ..ودة كان شرطنا عشان تبقى جمبنا ويبقى ليها مكان تقعد فيه لما ترجع ان شاء الله .. بس هى هتتجوز وتقعد حبة بتاع اسبوع وبعدين تطلع الاقصر واسوان ودهب وترجع تانى كايرو لحد ما اجازة مصطفى تخلص وبعدين يسافر هو ويخلص الاجراءات ان شاء الله وبعدين هى تسافرله ان شاء الله
يعنى فى حدود شهرين كدة بعد ماهو يسافر
يعنى كدة هاتسيبنا مرتين ..مرة لما تتجوز ومرة تانى لما تعد معانا الشهرين وترجع تسافر
أنــا : بص .. هو ان شاء الله ربنا يباركلهم ويوفقهم سوا ..وانا لانى مجربة موضوع اخت العروسة دة قبل كدة .. احب اطمنك يا احمد انك مش هتتعود ..ومش هتعرف تنساها وتتعايش من غيرها .. احب اطمنك ع الاخر يعنى
فاير : وغـــــــــــــــــدة وغ والله ههههههههههه هم يضحك وهو يبكى
محدش يسأل على غ ..دة سيييييييييم
انــا : طيب قولنا بأى على تجهيزات الحنة بكرة ؟
فاير: م الحنة حضرتك بتبقى بنات بس وانا اطمنك انى مطرودن مطرودن يا ولدى .. ممكن بأى اروح حنة العريس
أنــا : ايوة بس اكيد لازم يبقالك فيها دور يعنى
فاير: لا ماليش اخرى اجيبلها الفستان من الاتيليه .. انا هيبقالى بأى يوم الفرح ان شاء الله ربنا يعديه على خير
خاييف اوى .... اوى .. متوتر
وفضل يلعب شوية ويبعت اموشنز ومؤثرات صوتية ( انا غبى .. هل انت مجنون .. ان لصبرى حدود )؟؟
أنــا : انت غبى اه انا عارفة .. اه انا مجنون عشان عرفتك .. اخلص بقولك تجهيزاتك ايه
فاير: اصل انا زهقت ولقيت هيجيلى باد فيلنج فقاعد العب بالمؤثرات الصوتية
أنــا : طيب خلاص
فى نهاية اللقاء الوغد غ اقصد احمد .. وعدنا بأنه هيوافينا باخر التفاصيل عن الحنة والفرح ..مصحوبة بالصور
واحنا فى نهاية اللقاء بنبارك جدا لبوسى ونقولها الف مبروك هتخلصى من احمد اخيرا
حبـــــــــــــــة فضايح وبيغيظنى شان هو معاه 3 جنيه رصيد وانا معايا 15 قرش فى رصيد الموبايل
أنــا : خلاص الى اللقاء عشان الفضايح وكل دة هيتشال فى المونتاج
فاير: ههههههههههههه ايه دة هو الحاجات دى مش هتتشال فى المونتاج ؟؟ يعنى اخلص والاموشنز دول هيطلعو ؟؟
نياهاهاهاها كله طلع يا وغد
انــا : ايوة اخلص يالا قول كلمة للقراء خلينا نقفل الحلقة قبل ما تقفل على صباعك
فاير: بنهنى الحاجة ام كريم وتيته ريم وجدو حمادة .. بزفاف الاستاذ جعيدى حفيد جدو حمادة وتيتة ريم ..ومن خالتو وخالو بالسعودية ومن هنا وهناك ومن بابا وماما وعمو وعمتو فرح .. الى الاهل والاحباب بكوم الدكة ههههههههههه الى عزة المقدم احمد عبد السلام .. السلام عليكم من بلد الامن والامان .. وحب اسمع اغنية سيد الحبايب يا ضنايا انت .. ولكل شاب ولكل فتاه لا تنحرف . ولو عمك ضربك وسرق منك عقد الشقة بوس ايدك شعر ودقن
أنــا : بما ان احمد رغاى ومش عايز يخلص فى سنته .. هنقفل الحلقة على لسانه مش على صباعه
فاير: دة الارسال خلص .. وشششششششششششششششششششششششششش
أنــا : انزل باتتر يا حنفى وبلااااااااش وشششششششششششششششششششششششش

Wednesday, December 19, 2007

كل سنة وغيرى طيب


عيـــــــــــــــــــــــــد
لحد ما أفهم

Monday, December 10, 2007

الفيلم




واحدة واحدة معايا


__________________


فى الاول خالص : مزيكا لقيتها عندى على الجهاز بلا هوية ومش فاكرة مصدرها بس حلوة وعجبتنى استخدمتها مع التتر البداية ، أستخدمت صور مش انا الى لقطتها لكن منزلها من ع النت


استخدمت فى المونتاج برنامج ( मोविएमकर- ulead vediostudio.१०) وربنا ما يحكم على حد يشوف الى شفته من اليوليد


الموسيقى التصويرية للفيلم نفسه بعتهالى محمود بلال ( صاحب مدونة كلمتين واقفين فى زورى ) لبودا بار


التعليق: هههههههههههههه لا تعليق ، بس اكتشفت انى مبعرفش انطق عربى والدنيا بايظة عندى


الفاصل : فضلت ان يبقى فى فاصل بين كل مرحلة والتانية ومع ذلك لما اتفرجت على الفيلم حسيت مش عارفة ليه انى بنط فى الفيلم بطريقة وبأسلوب بيضحك ههههههههه


التصوير : كان مآساه شوية ومش هتكلم عنه، بس الى حد ما كان بشكل عشوائى مش مرتب وغريب والكاميرا كانت ملحوسة هههههههههه والعدسة مش ممسوحة ،،،، استغفر الله العظيم يا رب


اماكن التصوير : صورت فى المقطم والقناطر والنيل ووسط البلد و الحسين والأزهر وأماكن قديمة كدة مش عارفة هى ايه والعتبة ( اعتقد كانت فسحة اكتر من شغل ) ربنا يدينى الصحة يارب


طبعا مش كل الأماكن دى طلعت فى الفيلم بس انا زى ما قلت البوست اللى فات انا غيرت فكرة الفيلم كذا مرة حتى بعد ما بدأت التصوير نفسه


مدة التصوير: تقريبا مش جمعت داتا التصوير غير بعد تلات اسابيع وبعدين بدأت مونتاج مش هقول انا عدته كام مرة خليها سر عشان الحسد يعنى


الكوميدى بأى واللى يسخسخك من الضحك ( ولعل شر البلية ما يضحك حضرتك): هههههههه حسبى الله ونعم الوكيل ، الفيلم مش عليه درجة واحده


كفاية كدة خلينى اقوم ابص فى الكتاب اقرالى كلمتين ينفعونى


Sunday, December 9, 2007

كان هم وانزاح


كان بمثابة جدار عازل، او سد عالى ، او فاصل منيع ،، يا لهوووووووووى مش عارفة ايه دة ، مشروع كبير لازم يتعمل ، وقت ضيق ، امكانيات محدودة ، أفكار كتيرة ، تخيلات مجنونة ، دوشة كتير، دة الفيلم التسجيلى الى كنت لازم اعمله كتطبيق على مادة عندى اسمها سنيما تسجيلية ،، ما علينا
كان عندى افكار كتير جدا من يوم ما دخلت الكلية وانا مستنية اخر سنة دى عشان ابدع فى التصوير ( انا بحب التصوير جدا ) وبالفعل ابدعت ونص الصور طالعة مايلة زى اليوم المايل ههههه ، كنت بجد بتمنى الوقت يمر بسرعة عشان فى الليسانس اعمل الفيلم ( اصل بحب المونتاج جدا والاخراج اكتر كمان ) وكنت بحس ان ليا رؤية فنية كدة الكل بيقتنع بيها وكنت بحب اوى اعرف زوايا الكام وحركاتها وأساليب النتقال والتأثيرات على الصورة وجو كدة تمام يعنى ॥ بس الحمد لله فى التطبيق كنت هايلة هايلة يعنى اكتر من ما اى حد يتوقع ( بلاش تتوقع والنبى خليك كدة واخد فيا مقلب) المهم
بعيد عن الافكار الكتير الى كانت فى بالى وبحضرلها من سنة اولى ،، ومتسألنويش كانت عن ايه او سيبتيها ليه لان انا اصلا لحد وقت التصوير نفسه غيرت الفكرة مرتين او تلاتة
ومش هقول على الصعوبات الى قابلتها وعلى الناس الذوووق الى عطلوا حاجات كتير أثناء التصوير ( حسبى الله ) ومش هقول ع الانهيار الى انا كنت فيه كل ما كان الوقت بيجرى من ايدى وانا لسة معملتش حاجة ، مش هقول ع العذاب الى عذبته للناس بمودى السخيف ودمى التقيل عليهم هههه معلش بأى ،، مش هقول على البلاوى الى حصلت (انا قلت اه بس مش بالتفصيل يعنى ههههه ) انا بس كل الى عايزة اقوله ،، شكـــــــــــــــرا
الحمد لله أوله وأخره ان الموضوع تم على خير
شكراً لأمى : لأنك استحملتينى وانا مدايقة وكنتى معايا على طول وبتدعيلى طول الوقت
شكراً لجهاد أختى : لانها مسابتنيش خالص وكانت بتهدينى دايما
شكراً يانهاد اختى بردو ومش عايزة ازعلها ههههههههه وكمان محمد اخويا فاكهة البيت
شكراً لصحابى كلهم : اكيد دعاواتكم انقذتنى :)
هيثم : انت انقذتنى ميرسى كتير ويارب يوفقك ان شاء الله
جيكو : هههههههه عشرة عمر يا ناس هههههه من ايام الجيزة ، يا جيكو انت من غيرك كان زمان جهازى لسة مهيس كالعادة وكان الفيلم أساسا مخلصش، جيكو يا جماعة هو اللى ورانى ازاى اسيف الفيلم بعد ما اخلص المونتاج ، ربنا يكرمك يا بنى وتلاقى عروسة طيبة كدة زييى بالظبط ههههههه وتعاملك زى ما بعاملك كدة بردو
دودو وفاير: ميرسى على اليوم الجميل الى قضناه سوا واحنا بنلف وبنصور وانت يا فاير كنت مذيع هايل بس شيلتك فى المونتاج نياهاهاها والبطاطس والشوكلاته الصراحة كانوا هايلين والجو كان رائع ، هو ساقع اه بس يعنى كان حلو بيكم
رحيل : هههههه بس كدة انتى فاهمة وانا فاهمة ومالوش لازمة الناس تعرف
أحمد خيرالدين ( ولاد النهاردة ) : عملتلك دوشة وطلعت عفاريتى وانت الصراحة كنت احد الاشخاص اللى كانوا بيهدونى وبيعملولى ريستارت ، مش عارفة أقولك ايه؟ يارب نفضل صحاب على طول
شكرا لكل اللى دعالى بالتوفيق واتمنالى الخير، شكرا لكل اللى استحملنى وقت ضيقى ، شكرا لكل اللى ساعدنى او حاول يساعدنى
بجد ربنا يديم معرفتى بيكم كلكم يا أحلى ناس عرفتها فى حياتى
قريبا جدا سنوافيكم بتفاصيل الفيلم
-:تحديث
سورى يا احمد اتلخبطت فى اسمك ، بس متعودة اقول فخر الدين على طول يعنى
انا نسيت حد مكانش ينفع انساه (وش مكسوف جدا)
هشام : اينعم هى كانت مجرد محاولة انك تساعدنى ، بس بجد سابت اثر جامد جدا معايا ربنا ما يحرمك منى يا ابنى

Wednesday, November 21, 2007

أبو صلاح


عجبتني كلمة من كلام الورق
النور شرق من بين حروفها و برق
حبيت أشيلها ف قلبي .. قالت حرام
ده أنا كل قلب دخلت فيه اتحرق
عجبي !!!




ليه يا حبيبتي ما بيننا دايما سفر
ده البعد ذنب كبير لا يغتفر
ليه يا حبيبتي ما بيننا دايما بحور
أعدي بحر ألاقي غيره اتحفر
عجبي !!!

Tuesday, November 6, 2007

رواية قذرة



!!هل قد تصل القذارة والوقاحة الى هذا الحد من التطور؟؟؟ يا نهاااااااااااار اسووووووود
اتفرجوا على المسخرة يا حضرات

Thursday, November 1, 2007

اممم عشان ماليش غيركم مؤقتاََ بس

هابى فالانتين يا حبيبى


وبقولهالك واحنا فى يوم مفترج زى دة ، كان نفسى نكون سوا ، بس انت شكلك فقر كدة ومش عايزنى اتكعبل فيك وأشوفك بأى ونرتاح ،ويارب المرة الجاية اكون شفتك ،عشان انا زهقت من كتر ما دعيت ربنا تيجى وانت مش بتيجى ومن كتر ما قلت يارب اشوفه ولسة مش شفت وشك
خلينى كدة قاعدة مستنياك اما نشوف أخرتها
حبايب قلبى



لقد كانت هناك محاولة فاشلة للفرار منكن العيد دة (شريرة مش كدة)بس معرفتش هههههههههههههه عشان احنا زى العقد الملضوم الى مش عايز يسيب بعضه ، بس انا كان عندى امل ان لو واحدة فكت نفسها الباقى هيكر ، بس انتوا اللى فقر بأى مش هاين عليكو ابتدى انا هههههههههه يالا كله هيهون ، مفيش احلى من لمتنا بأى خلاص ههههههههههههههه
صحاب بجد




امممم مش عارفة بجد أبدأ كلامى معاكم منين ،مش عارفة ممكن أعترف فى الاأول انكم أحلى حاجة فى حياتى ولا دى أصبحت بديهيه وانتو عارفينها خلاص؟؟ ولا أقولكم شكرا على كل لحظة حلوة كنا مع بعض فيها ولا هيكون أولى بالشكر انى أقولكم شكرا على كل موقف صعب وقفتوا معايا فيه ولا اقول انكم الوحيدين الى مش اتخدعت فيكم،،،،،، أقول ايه بس، افتكر اى ذكرى اللى أحلى من التانية،، كوستا والمطرة والأيس كريم فى عز التلج ،، ولا عز الحر والشمس يوم ما حرقتنا ،،ولاالمركب فى وسط النيل

طيب افتكر المكالمات الى دامت قبل كدة ساعات لحد الصبح ولا المسجات الى تهلك من الضحك ولا المسجات الى بتخرجنى من الوحدة ،،ولا نخلينا فى النت والمسنجر والضحك والجو المسخرة الى كنا بنعيشه؟؟ طيب أقول على أيام الجامعة والتزويغ من المحاضرات ،ههههههههههههههههه(فضيحة) ولا أقول على المواصلات الى كانت بتهد حيلنا ونحلف ما هنركب الا سوا طيب أيام المذاكرة والبلاوى والجنان الى كان بيحصل؟؟ هههههههههههههه

طيب كفاية فضايح وندخل على أيام رمضان والفطار لما بنتجمع سوا ولا صلاة التراويح لما بنروحها بليل بعد الفطار وبنتجمع على طاعة ربنا ،، بجد مش عارفة أقول ايه انا بحبكم أوى ومش ينفع أستغنى عن حد فيكم تانى لأى سبب من الأسباب

عارفين بجد احلى حاجة بحبها فيكم انكم لاسعين وشايفين ان الجنان احدى مكملات الدنيا ودة أحد الأسباب اللى مخليانى مكملة معاكم ومش عارفة اسيبكم

ربنا يخليكم يارب ليا وانتم عارفين نفسكم طبعا:)

مكسوفة منكم جدا


باردون

مكانش قصدى



ناس جديدة


بس زى العسل

ربنا يديم المعروف




كلو كلو كلو كلو

واخوانا فى التدوين

(الصداقة البلوجرية)

هابى فالانتين داى

ويارب صحاب على طول

Tuesday, October 30, 2007

نأسف للتأخير


السلام عليكم ورحمة الله وبركاته
وحشتونى جدا
بئالى فترة كبيرة مش كتبت حاجة
أعذروا تأخيرى كان غصب عنى
كلية وأخر سنة بأى وبتاع
"يارب تنجح يا تتح "
أوعى حد ينسى يدعيلى
المهم مش هطول عليكم
بس بجد شكرا لأى حد دخل المدونة وعلق
ههههههه أو حتى ماجالوش نفس يعلق وخرج على طول
وانتظرونى ان شاء الله قريب اوى
بجد مش هتأخرا لمرة دى
:)

Thursday, October 18, 2007

...بـث تـجـريـبـــــــى




بسم الله الرحمن الرحيم
يــــــــارب
****************
فكرت كتير أوى أول بوست ممكن أكتب فيه ايه؟؟
وتعبت أوى عشان جالى أفكار كتير مقدرتش اختار منها
وأخيرا قررت انى هكتب اى حاجة تيجى على بالى
دون اعداد مسبق
دون ترتيب أفكارى
دون تدقيق لغوى
دون اى حاجة
هكتب براحتى وعلى مزاجى
هكتب بروحى ..مش بعقلى ولا قلبى
يارب تساعدنى .. عايزاك جمبى